LEGAZPI CITY — Nasa kustodiya na kan mga otoridad an ipigkokonsiderar na number 2 sa listahan kan most wanted person sa banwaan kan Daraga, Albay.
Segun ki Pol. Supt. Benito Dipad, hepe kan Daraga Municipal Police, binisto an suspek na si Pio Llorente, 70-anyos, sarong karpintero asin residente kan Barangay Mayon.
Naarestar an suspek sa pinagtatrabahuhang iceplant sa Barangay Poblacion, banwaan kan Cawayan, Masbate.
Segun ki Dipad, nakipagkoordinar an hepatura sa Cawayan Municipal Police kun kaya nagtrayumpo an pagseserbi kan warrant of arrest kontra sa suspek.
Si Llorente an nahahampang sa 13-counts kan pagbalgar sa Republic Act 7610 o an Anti-Child Abuse Law na may rekomendadong pyansa na P200,000 kada saro.
Maabot man sa P2.6 milyon an kabilugang kantidad kan pyansa para sa paramientras na libertad kan suspek.
Dugang pa ni Dipad, maaraman sa aldaw nin Lunes kun saing detention cell dadarahon an suspek.
