LEGAZPI CITY—Arestado an sarong lola sa ikinunundusir na buy-bust operation kan mga otoridad sa Tabaco City huli sa pagbalgar suboot sa illegal possession of explosives.
Segun ki Tabaco City Police Station Officer in Charge Police Lieutenant Colonel Virgil Bibat, sa intrevista kan Bombo Radyo Legazpi, binisto an suspek na si alyas “Lisa”, 70-anyos, asin residente kan Purok 5, Barangay San Roque kan nasabing ciudad.
Naarestar ini sa pinagsarong operatiba kan Tabaco CPS asin Maritime Police Station.
Segun sa opisyal na haloy na soboot na pigsubaybayan an nasabing persona asin naarestar ini sa tabang kan impormasyon kan namamanwaan.
Basado man sa saindang nagunong impormasyon na haloy nang nagpapabakal ini nin siring na ilegal na mga pampasabog.
Nakumpiskar digdi an 50 blasting caps, labi sa 12 kilo na ammonium nitrate, apat na metro nin time fuse na posibleng piggagamit suboot sa ilegal na pagsisira.
Sa presente, nasa kustodiya kan Tabaco CPS an suspek asin mga nakumpiskar na ebidensya para sa magkakanigong disposisyon.
