LEGAZPI CITY- Inasegurar kan Philippine Institute of Volcanology and Seismology (PHIVOLCS) na warang guranong significanteng koneksyon sa aktibidad kan bulkang Mayon an nanotaran na pagbaba sa nairerehistrong paghiro sa palibot kaini.
Base kaya sa ipigluwas na latest volcano bulletin kan ahensya, 7 volcanic earthquakes sana an nairehistro, na hibabaon kun ikokompara sa labi 100 o maabot sa 200 sa mga nakalihis na aldaw.
Sa pag-eksplikar ni PHIVOLCS Dir. Renato Solidum sa intrevista kan Bombo Radyo Legazpi, kun pagbabasehan suboot an paghiro na konektado sa lava fountaining, lava flow asin rockfall events, diit sana man an nairehistro.
Dugang pa ni Solidum na kaipuhan suboot na bantayan, iyo an biglaan na pagtoninong kan bulkan o nawara an paghiro kan magma na posibilidad man na pagkabara kan pressure alagad dagos-dagos pa man suboot an pagluwas kan magma sa presente.
Mientras tanto, dawa pa nagbago an ipinapahiling na aktibidad kan bulkan, segun ki Solidum na wara pang kasiertuhan kun mapadagos man an trend na pababa na dapat abangan sa mga masunod na aldaw.
