LEGAZPI CITY – Arestado sa anti-illegal fishing operation an pitong persona sa Fish Sanctuary kan Brgy. Calintaan, Matnog, Sorsogon.
Binisto an mga naarestar na sinda Alvin Gardon, Miguel Gillego, Arnel Espiranzate, Ryan Garra, Harvin Espiranzate, Juan Gabas, asin Domingo Gavara na gabos residente kan Brgy. Tabunan sa nasambitan na banwaan.
Segun sa impormasyon, naaktuhan an mga akusado na imbwelto sa iligal na pagsisira mantang nagkokundusir nin seaborne patrol operations an pinagsarong pwersa kan Matnog Municipal Police, Provincial Public Safety Company (PPSC), Regional Public Safety Batallion (RPSB) asin Matnog-Bantay Dagat.
Narekober sa mga ini an limang pidaso nin wooden paddle, duwang goggles, duwang net na pigagamit sa pagsisira, duwang fishing fin, duwang motorized fishing boat, asin tulong kilo nin manlaen laen na klase nin sira.
