LEGAZPI CITY — Iprinisentar sa media kan mga otoridad an pitong miyembro kan rebeldeng grupong New People’s Army na nagsurendir sa mga banwaan kan Milagros, Masbate.
Sa report ni Bombo Radyo correspondent Jess Parion, kusang nagsurendir ki 2nd Infantry Batallion Commander Lt. Col. John Oliver Gabon an mga ini na kumpwesto nin sarong babayi asin anom na lalaki. Kasabay man na isinurendir kan mga rebelde an M16 rifle, caliber 45, caliber 48, duwang rifle grenade, shot gun asin mga bala nin manlaen laen na klase nin badil.
Segun ki Masbate PNP Provincial Director Police S/Supt. Froilan Elopre, an pagsurendir kan mha ini an resulta kan saindang padagos na pangapudan sa mga rebelde na magsurendir na asin magbalik loob sa gobyerno.
Mientrastanto, nakioaly man an mga otoridad na dae na ipagpaluwas an anuman na impormasyon dapit sa nasambitan na mga persona para sa saindang seguridad.
Nagpromesa man an Department of the Interior and Local Government (DILG) na itatao sa mga ini an benipisyo na ipigpromesa kan gobyerno asin an mga armas na ipig-turn over sa mga otoridad an igwa man na aktumbas na kantidad nin kwarta.
Katakod kaini, padagos man giraray an pangapudan kan DILG sa mga mawot nang magsurendir na gibuhon na ini sa urog na madaling panahon ngani na dae na malaag pa sa peligro an saindang buhay.
