Pito an nairehistrong gadan mantang labi 100 an lugadan sa banggaan kan duwang tren sa ciudad nin Giza sa Egypt kasubanggi, Domingo, Nobyembre 8.
Kaiba sa mga nagadan an nagmamaneho kan saro sa mga tren, segun sa health ministry kan nacion.
Segun sa awtoridad, nangyari an insidente kan magsalpukan an duwang tren na pasiring sa sur hale sa Giza asin Cairo, asin nagdiskaril an pirang bagon asin nahulog sa embankment.
Ipinagboot ni Egyptian President Abdul Fattah al-Sisi sa mga awtoridad na imbestigaran an insidente asin tukuyon kun siisay an dapat managot.
Isinairarom na sa heightened alert an mga haraning ospital huli sa pagdagsa kan mga pasyente, mantang posibleng maglangkaw pa an bilang kan mga nagadan.
Nagtabang naman an Egyptian Red Crescent, sarong Cairo-based humanitarian organization, sa pag-alalay sa mga lugadan sa paagi nin paenot na bulong asin psychological support.
Isinuspinde an operasyon kan linya kan tren sa pag-ultanan kan Giza asin Upper Egypt mantang ginigibo an clearing operations.
