LEGAZPI CITY- Cleared na sa iligal na droga an pitong banwaan sa probinsya kan Albay base sa ipinasang listahan kan Philippine Drug Enforcement Agency (PDEA.)
Ini an kinumpirmar ni PCI Arthur Gomez, tagapagtaram kan Albay PNP.
Nakapagrehistro an probinsya nin 106 drug-affected barangays gikan sa 17 munisipalidad.
Sigon ki Gomez, 52 na sa mga ini o 49.05% an drug-free mantang 54 pa an pig-iingwahan kan manlaen-laen na unit kan pulisya na mapalibre kontra sa ipigbabawal na bulong.
Kabale sa pitong drug-cleared na banwaan an Malilipot, Malinao, Manito, Camalig, Jovellar, Polangui asin Libon.
Mientrastanto an syudad kan Legazpi an igwa nin pinakadakol na drug-affected barangay na igwa nin 16 na hasta sa ngunyan, dae pa nin naki-clear kabale na an Pio Duran na igwang 2.
Pahayag pa ni Gomez, direktiba ni PNP Provincial Director PS/SUPT Antonino Cirujales na dae magha’dit huli ta OK lang na mahaluyan basta an importante, mapuho an illegal drug activities sa mga lugar na dae pa nakabale sa drug-cleared municipalities.
Pangapodan man ni Gomez sa mga nasambitan na banwaan na dae na pagpabayaan na liwat na makalaog an droga sa saindang lugar ngani na magin libre sa ano man na drug-related crimes.
