Legazpi City- Mahigot na pigtututukan kan transport group na PISTON an halangkaw na buwis sa mga produktong petrolyo sa nasyon huli sa labing naapektaran na an lambang mga sektor sa nasyon kan Pilipinas.
Sa intrevista kan Bombo Radyo Legazpi kay Mody Floranda, an Presidente kan grupong PISTON o Pagkakaisa ng mga Samahan ng Tsuper at Opereytor Nationwide, mawot kaini na na bako lang an sektor kan mga tsuper an makinabang kundi gabos na sektor an magkaigwa nin kagianan sa pasakit na dara kan halangkaw na presyo kan produktong petrolyo.
Dugang pa kan opisyal na dae na man naglalaom an saindang grupo sa mga ayuda asin pagpapalangkaw sa presyo kan pamasahe huli sa suboot dae man ini maisasakatuparan sa irarom kan administrasyon.
Naiiling man kan opisyal na bako man rason an mga tensyon sa ibang nasyon sa paglangkaw sa presyo kan naunambitang produkto. Kung babalikan suboot haloy asin pirang taon nang padagos an paglangkaw kan presyo kan produktong petrolyo alagad dae man giraray na nagigibong lakdang an presenteng administrasyon. Asin padagos na pinagtutugutan na samantalahon kan mga oil company an mga sitwasyon sa World Market para langkawan an presyo kan petrolyo.
Nangapudan man an opisyal sa gobyerno na gibuhan asin tawanan na ini nin aksyon huli sa labing kagabatan na an namamatian kan mga tsuper asin kan mga namamanwaan huli sa halangkaw na presyo kan produktong petrolyo asin sabayan pa kan iba pang mga pangenot na pangangaipo kan kumunidad
