LEGAZPI CITY-Natawanan na kan gobierno kan Pilipinas nin tabang pinansyal an nasa 682 overseas Filipino workers (OFWs) na stranded sa gera sa Israel.
Segun sa Department of Migrant Workers (DMW), nakatanggap an mga OFW nin tabang pinansyal hale sa DMW Rapid Response Team (RRT) na naka-deploy sa nasambitang nacion poon kan Hulyo 7.
Dinalaw man kan response team kairiba an Overseas Workers Welfare Administration (OWWA) team asin nagtao nin emergency relief asin financial assistance para sa OFWs na nasa mga ospital, kairiba an mga naraotan nin harong huli sa mga pag-atake asin mga nawaran nin trabaho.
Sa kabilugan, nagabot na suboot sa 870 OFWs an natabangan kan pamahalaan poon kan magpoon an palitan nin pag-atake sa pagultanan kan Israel asin Iran.
Magigirumduman na naglalawig pa an tensiyon sa tahaw kan sirangang rehiyon poon kan Hunyo 13 makalihis na maglunsar nin air strike an Israel sa military asin nuclear facilities kan Iran na guminadan sa maabot sa 900 katawo asin nasa 4,000 an irido.
Kinumpirma man kan DMW na gadan na an Pinay caregiver na si Leah Mosquera na nagsairarom sa surgeries asin nagtenir sa intensive care unit (ICU) nin pirang semana makalihis na magsapo nin injuries sa missile strikes kan Iran sa Rehovot City sa Israel kan Hunyo 15.
