LEGAZPI CITY- Palaisipan ngunyan an pagkagadan kan sarong 68-anyos na babayi na nadukayan an hawak sa sarong salog sa Purok 2 Barangay Basag, syudad kan Ligao.
Binisto an biktimang si Leonora Alcadeza na residente kan Sitio Kitikwi Barangay Anoling Camalig, Albay.
Enot kaini, sarong concerned citizen an nagpaabot kan impormasyon sa Ligao City Police Station dapit sa nadukayan na bangkay sa gilid kan sarong salog sa nasambitan na lugar.
Pigsasabing sarong Joven Pelingo, 55-anyos an nakahiling digdi na solamenteng kolor brown na tshirt an sulot.
Nagluwas sa imbestigasyon kan nasambitan na pulisya na enot nang nahiling ni Jun-Jun Olmeda, 33-anyos an biktima sa tahaw kan salog asin nakatukaw sa gapo.
Inalalayan nya suboot ini pasiring sa gilid kan salog.
Susog man sa pahayag kan kaparientes kan biktima na sinda Mayen Guiriba asin Gemma Guiriba, huri nindang nahiling an ina sa saindang harong sarong aldaw antes ini nadukayang gadan.
Ngani na makasierto sa kawsa kan pagkagadan kaini, ipigsairarom an bangkay sa otopsiya.
Sa ngunyan, nagpapadagos man giraray an imbestigasyon kan Ligao CPS dapit sa nasambitan na insidente.
