LEGAZPI CITY — Nagtagilid an sarong van sa hibabaw na bangin na igwang lunad na Vote Counting Machines (VCM) sa kahalabaan kan national road sa Brgy. Codon, San Andres, Catanduanes.
Pigmamanehar ni Anselmo Burac Jr., 32-anyos na residente kan Brgy. Tubli sa Caramoran an puting van na may plakang 050108 na pasiring sa Virac.
Sa intrevista kan Bombo Radyo Legazpi ki Pol. Capt. Roderick Dismaya, hepe kan Sa Andres Municipal Police, paramientras na nagpundo an nasabing van tangarig na mag-ihi an driver.
Alagad dae suboot kaini nanotisyaran na malumoy an daga sa pigparadahan asin may luho pa sa gilid huli sa pigigibong imburnal.
Dugang pa sa gabat kan behikulo an nasa 21 pidaso nin VCMs na karga asin 19 battery na nagcausa tangarig na mag-collapse an baba.
Tulos man na dinara sa ospital an mga pasaherong sinda Nerissa De Quiroz, municipal coordinator kan VCM asin aking si Elynique Ann Naanod na staff kan courier service.
Nagsapar an mga ini nin diit na lugad huli sa nangyari mantang marikas man an nagin responde kan mga otoridad.
Afuera sa nasabing insidente, wara man na ano mang election-related incident na nangyari mantang normal man an biyahe sa mga port mantang wara man na delay.
