LEGAZPI CITY- Dead on arrival sa ospital an sarong 60-anyos na lalaki makalihis na mabangga kan sarong kotse sa Brgy. Bonot syudad kan Legazpi.
Base sa imbestigasyon kan Legazpi City Police Station, nagbabalyo kuta sa tinampo an biktimang si Jorge Navarra na residente kan P-5 kan nasambitan na lugar kan aksidenteng mabangga kan behikulong pigmamanehar ni Joseph Adrian Masip, 18-anyos na residente kan Brgy. 16 Kawit East Washington Drive, sa parehong syudad.
Nagsapar nin mga lugad sa hawak an biktima na binalo pang idalagan kan ambulansya sa ospital alagad dae na nakaabot pang buhay.
Katakod kaini, inarestar kan nagrespondeng mga pulis si Masip asin presente nang nasa kustodiya kan nasambitan na istasyon kan pulisya para sa magkakanigong disposisyon.
