LEGAZPI CITY – Nagkalasug-lasog an hawak kan driver kan motorsiklo mantang may mga tama man sa payo asin hawak an limang iba pa makalihis an nangyaring salpukan kan truck asin motor sa boundary kan Brgy. Estancia, Malinao asin Brgy. Quinastillojan, syudad kan Tabaco.
Base sa nagunong impormasyon kan Bombo Radyo Legazpi, pigbabaybay kan driver kan truck na si Rommel Nances an tinampo hale sa syudad kan Ligao pasiring sa Tabaco kan mawaran suboot ini nin kontrol huli sa gabat kan kargang sheet pile o mga bakal.
Nagluluwas man sa imbestigasyon kan kapulisan na inagaw kan nasabing truck an linya kan motorsiklo na pigmamanehar ni Albert Behino, 27 anyos, residente kan Purok 7 Soa, Malinao.
Nahiling na suboot ni Behino na nagpapagewang-gewang an truck kun kaya naggilid na ini alagad, inabot man liwat kan truck asin inarado pa kan behikulo an residential area sa lugar.
Tulos man na nagadan an mga biktimang lunad kan truck na may tama sa manlaen-laeng parte kan hawak na binistong sinda Orlando Bañadera, taga-Del Rosario, Naga City asin nakisakay sana suboot asin an pahinante kan truck na si ‘James’.
Mantang putol an hawak kan driver kan motor, pighahanap pa an walang bitis kan agom kaini na si Jasmine Boringot asin nakalasik man an adapted child kan mag-agom na si Clark.
Apwera pa sa anom na biktima, idinalagan man sa ospital an duwang bystanders na nadamay sa insidente.
Sa presente, padagos pa an pigsasagibong imbestigasyon sa nasabing insidente.
