Pighahanap na ngonian kan mga otoridad an mga responsable sa pag-abandona kan sarong fetus na nadukayang gadan sa Baguio City nganing panimbagon sa ley an saindang ginibo.
Kan Huwebes, Hunyo 12, sarong residente kan Lower Bengao, Bakakeng Central an nakigkig kan mahiling an saiyang ayam na may pigparong na kakaiba.
Segun saiya, paluwas siya kaidto nganing pakaunon an saiyang mga ataman kan mapansin an hiro kan saro sa mga ini.
Kan saiyang ranihan nganing siyasaton, nakigkig siya kan madiskubreng bako basta bagay an pigpaparong kundi sarong omboy.
Tulos na naghagad nin tabang an babae sa mga awtoridad.
Mabrikas mang rumesponde an mga personahes kan pulisya asin inako an somboy na sarong lalaking fetus nganing matawan ini nin maray na lubong sa Baguio Memorial Service.
Basado sa inisyal na report, pigkakarkulong 6 months old na an nasabing fetus.
Katakod kan imbestigasyon, nakikipagtabangan na an Baguio City Police Office sa Baguio Health Department nganing maaraman kun siisay an mga kababaihang 5 hasta 6 na bulang bados sa lugar, bilang parte kan pagsisiyasat kun siisay an posibleng may kinaaraman sa insidente.
