LEGAZPI CITY-Nagabot na sa anom katawo an kumpirmadong nagadan mantang nasa 23 an irido makalihis an insidente kan pagkahulog kan sarong pampasaherong bus sa bangin sa Andaya Highway, Barangay Magais 1, Del Gallego, Camarines Sur kansubago nin maagahon, Disyembre 26, segun sa report kan Del Gallego police.
Pasiring sa Gubat, Sorsogon an bus hale sa Cubao, Quezon City kan bigla ining malihis kan pagpapadalagan asin tuluyang buminagsak sa bangin.
Padagos pang pigaaram kan mga otoridad an pagkakakilanlan kan mga nagadan mantang idinara na sa ospital an mga nairido.
Bisto an Andaya Highway sa matatarik na kurbada asin bangin, kaya pirmihan na pinapatanidan an mga motorista na mag-ingat sa pagagi sa lugar.
Sa mga nakalihis na taon, nagkapirang insidente na nin pagkahulog kan bus asin truck an nairehistro sa parehong kalsada, na kadalasan huli sa overspeeding o mechanical failure.
Huli digdi, nagsasagibo na nin mabusising imbestigasyon an PNP asin LTFRB ngani masierto an paninimbagan kan operator asin maibitaran an siring na trahedya.
