LEGAZPI CITY- Wara nang dulag sa mga otoridad an anom na drug personality makalihis na maaktuhan na nasa transaksyon kan iligal na droga sa laog kan sarong dakulang lodging house sa banwaan kan Daraga, Albay.
Sa intrevista kan Bombo Radyo Legazpi ki Philippine Drug Enforcement Agency (PDEA) Bicol Director Christian Frivaldo, nilaog kan mga operatiba kan PDEA Albay an Room 61 asin Room 49 sa Neuhaus Inn sa Brgy. Maroroy kan nasabing banwaan makalihis na makakua kan impormasyon sa illegal drugs transaction sa laog.
Arestado an mga occupants sa Room 61 na binistong sina Marlon Fernandez alyas “Bok Fernandez”, 40 kan Brgy. Iraya, Guinobatan, Albay; Lorraine Santiago, 28 kan Blk 7 Lot 4 Phase 1, Antipolo City; asin Elmeph Conciado, 37 kan No. 17 Sinuna Village, Brgy. Mambugan, Antipolo City.
Dakop man sinda Jose Tabuena Jr. alyas “Third”, 55 kan No. 33 First Park Subd., Brgy. Sagpon, Daraga, Albay; Jan Mark Rapisura alyas “Matik”, 32 kan Brgy. Travesia, Guinobatan, Albay; asin Jomel Dela Cruz, 21 na residente kan Brgy. Dunao sa ciudad kan Ligao na nasa Room 49 kan mangyari an operasyon.
Nakumpiskar sa enot na kwarto an poco mas o menos 250 gramo kan pigtutubudang shabu na katampad an street value na P1.5 million mantang pigkakarkulong 50 grams kan shabu an nakua sa ikaduwang kwarto na nagkakantidad nin P340,000 siring man an buy-bust money asin iba pang drug items.
Sa ngonian, ipighahanda na an kasong pagbayolar sa Republic Act 9165 o Comprehensive Dangerous Drugs Act of 2002 na isusunad kontra sa mga ini.
Ipig-orgulyo man kan opisyal na resulta nin magayon na koordinasyon an nasabing matrayumpong operasyon.
