LEGAZPI CITY- Patong-patong na kaso an kakahampangon ngonian kan anom na personalidad makalihis na itukdo kan mga nabiktima sa budol-budol scheme sa provincia kan Catanduanes.
Sa intrevista kan Bombo Radyo Legazpi ki Virac PNP deputy chief PS/Insp. Danilo Penerete, modus kan mga suspek na sinda Steve Tan, Dave dela Cruz, Elmer Aggabao, Ritchie Sebastian, Marilou Soriano asin Evangeline Padilla na anas residente kan Metro Manila an magtangro kan frozen meat products na may libre pang freezer alagad warang nag-aabot na delivery en kaso maitao na kan buyer an kwarta.
Naarestar an mga ini sa Virac port mantang pigtutubudang nakabalik na sa Manila an apat pang kaibanan kan mga ini.
Mientras tanto afuera sa kasong estafa, posible pang mahampang sa kasong pagbayolar sa Republic Act 9165 o Comprehensive Dangerous Drugs Act of 2002 si Aggabao makalihis na makuhaan kan duwang plastic sachet kan pigtutubudang shabu mantang ipigsunad man an kasong Usurpation of Authority ki Tan na nakuhaan man kan PNP identification card.
Nakua pa sa inventory an labi sa P170,000 na cash sa manlaen-laen na denominasyon mantang piglalaomang madudugangan pa an kaso kan mga ini sa pagdulot kan iba pang mga biktima sa pito pang banwaan kan Catanduanes afuera pa sa mga pagtaraid na provincia.
Nagpagirumdom man an opisyal sa publiko na dae basta-bastang magtiwala asin siertuhon an veracity kan mga piglalaogang transaksyon.
