LEGAZPI CITY- Binawian ng buhay ang isang 6-anyos na bata matapos itong malunod sa ilog na nagko-konekta sa Barangay It-ba at Barangay Cawit sa bayan ng Manito, Albay.
Ayon kay Bureau of Fire Protection Manito team leader Fire Officer 3 Mark Leron sa panayam ng Bombo Radyo Legazpi na nag-usap usap ang mga biktima at mga kalaro nito na maligo sa naturang ilog at hindi napansin na nawawala na ang biktima.
Lumipas naman ang ilang oras bago nai-report ang insidente at nakapag responde ang mga otoridad.
Nang matagpuan ang bata ay agad naman itong binigyan ng first aid at naitakbo sa pagamutan subalit hindi na nailigtas pa.
Nabatid na ang naturang ilog ay may lalim na lagpas pa sa isang tao kaya hindi umano agad nakaahon ang biktima.
Kaugnay nito ay nagpaalala si Leron sa mga magulang na bantayan ang kanilang mga anak upang maiwasan ang kaparehong insidente.
