LEGAZPI CITY – Dae na nagibong maisalbar pa an buhay kan sarong 6-anyos na aking lalaki sa banwaan kan Caramoran sa Catanduanes makalihis na malunod mantang nagkakarigos sa dagat.
Segun ki P/Capt. John Michael Miraflor, hepe kan Caramoran PNP sa intrevista kan Bombo Radyo Legazpi, nagpaaram sana suboot an aking si Gene Jonel Bonifacio sa abuela na si Dominga Torres na mabakal nin halo-halo.
Alagad dae aram kan abuela, nag-iba an aki sa mga amigo asin pinsan pasiring sa Sitio Toytoy kan Brgy. Palumbanes tangarig na magkarigos sa dagat.
Bandang alas-3:30 kasuodma kan may bigla na sana suboot na nagkurahaw nin tabang para sa sarong aking nalunod kaya labing pagmundo ni Lola Dominga kan mahiling an makuapo.
Tulos man na idinalagan sa ospital an aki alagad ipigdeklarar na dead on arrival (DOA).
Napag-araman na nagpasyar sana an pamilya kan aki sa nasabing banwaan mantang sa kataid na banwaan kan Pandan ini nakaistar.
Mientras tanto, mahigot man an pagirumdom kan hepe sa mga magurang na bantayan an mga aki kun nagkakarigos sa dagat tangarig na makaibitar sa mga kaparehong insidente urog na patok na pasyaran an Palumbanes kun summer.
Naglatag na man nin mga personahes an kapulisan para sa anumang concern asin emergency response.
