LEGAZPI CITY-Kinumpirma kan United Nations na nagsakat na sa 589 an kumpirmadong numero kan mga binawian nin buhay huli sa magkakasunod na linog na tuminama sa norteng parte kan Venezuela kan Hunyo 24.
Mantang nagpapadagos an search and rescue operations sa lugar, nairehistro man an nasa 50,000 katawo na nawawara.
Kaiba sa mga nagadan an siyam na Portuguese national, apat na Espanyol, tig-duwang Brazilian asin Chinese national asin sarong Italian-Venezuelan.
Afuera digdi, 56 na Portuguese asin 120 na Espanyol an dai pa nahahanap.
Sa La Guaira, na pinakamatinding tinamaan kan linog, makikita sa mga satellite image an sunod-sunod na nagbagsakan na mga residential buildings.
Nairehistro man an nagkapirang insidente nin pangahahabon sa sarong supermarket.
Mientras tanto, nagabot na man an mga rescue team asin search dogs gikan sa manlain-lain na nacion ngani magtabang sa operasyon.
Segun sa UN, nahahampang an Venezuela sa pinakamalalang kalamidad sa laog nin labing sarong siklo, asin pinalala pa ini kan krisis sa ekonomiya, kakulangan sa serbisyong pangsalud, asin iba pang pangenot na serbisyo.
Napag-araman man na ini na an pinakamakusog na linog na tuminama sa Venezuela poon kan 1900.
