LEGAZPI CITY – Mahahampang sa kasong estafa ang sarong 54 anyos na lalaki makalihis ang ginibong panloloko kaini sa sarong establisimiento de negosyo sa siyudad kan Legazpi.
Segun ki Police Executive Mass Sergeant Carlos Paña, an tagapagtaram kang Legazpi City Police Station sa intrevista kan Bombo Radyo Legazpi, nagpabistong “Freddie Aguilar” ang suspek sa mismong maysadiri kang sarong hardware sa barangay Bonot, kan kaparehong syudad.
Sa salaysay kan complainant, sinugo suboot ang suspek kan saiyang boss na mag-order asin kuwaon ang mga construction materials sa saiyang tindahan.
Enot suboot na nalalay kang suspek ang maabot sa 26 mil de pesos na kantidad nin mga materyales sa primerong transaction.
Pinangakuan suboot ang tagsadiri kang hardware na babayadan sa paagi kan bank transaction.
Alagad, dae pa nakontento ang suspek nin huli ta sa ikaduwang bes, sa giraray na nambiktima ini sa kaparehong establimiento.
Liwat na nagbalik an nasambit na persona, mantang digdi na naberipikar kan tagsadiri na dae pa bayad ang mga naenot na materyales asin warang katotohanan na may nagsugo digdi.
Makalihis kaini, tulos na naghagad nin asistensiya sa Legazpi City Police Station ang manihamiento kang tindahan para sa dagos na pagkakaarestar kan suspek.
Sa presente, nagtetenir na ang naunambitang suspek sa hepatura kang Legazpi City Police para sa magkakanigong disposisyon.
Mientrastanto, narekober man kan mga otoridad sa possession kan biktima ang mga materyales na kinua kan nasabing suspek.
