LEGAZPI CITY—Maabot sa 53 abaca farmers an nakaresibi nin insentibo sa irarom kan Abaca Disease Management Project sa Barangay Mabini, Viga sa provincia kan Catanduanes.
Segun ki Philippine Fiber Industry Development Authority (PhilFIDA) Catanduanes Provincial Fiber Officer Bert Lusuegro, sa intrevista ka Bombo Radyo Legazpi, nakaresibe nin nasa P3,000 na insentibo an kada paraooma kun saen dapat na nakatutok ini sa pag-ibitar sa mga helang sa mga abaca.
Dugang ni Lusuegro na nakatalaan man na magbarewas nin siring na insentibo sa banwaan kan Caramoran sa masunod na taon nin huli sa saro ini sa mga lugar na naghalangkaw an disease incidents sa mga pananom na abaca.
Nagbisita man suboot si PhilFIDA Executive Director Arnold Atienza sa provincia nganing pangenotan an Training on the Safe Operation of the Spindle Stripping Machine with Good Agricultural Practices in Abaca Production sa San Miguel, Catanduanes.
Obheto kan nasabing aktibidad na mapauswag an kakayahan kan mga paraooma sa pag-operate kan abaca spindle stripping machines nin ligtas asin episyente mantang pigpapauswag man an tamang pagkapot kan fiber asin pagpapauswag kan kalidad sa produksyon nin abaca.
Mientrastanto, nangapudan man si Lusuegro sa iba pang ahensya na matabangan an saindang sektor huli sa kakulangan suboot kan saindang pondo siring man nganing mas mapauswag pa an industriya kan abaca sa nasambitang lugar.
