Pighayag kan Department of Foreign Affairs (DFA) na igwa pang apat na mga Pilipino an suboot nakipaglaban para sa Russia an presenteng nasa kustodiya kan Ukraine bilang prisoners of war.
Segun sa ahensya na lima na an kaso na kapot kan DFA katakod kan mga Pinoy na pigtataram na naging mercenary sa tahaw kan kariribukan sa pagultangan kan Russia asin Ukraine.
Segun ki DFA spokesperson Angelica Escalona, kumpirmado na an pagkakabihag ni Raymon Gumangan sa Ukraine.
Sinabi man ni Escalona na nakaresibe an DFA nin manlain lain na impormasyon kun papano na-recruit an mga Pilipino ngani na magpartisipar sa labanan.
Si Gumangan an enot suboot na nakaresibe nin online job offer na nagpromesa na may halangkaw na sahod sa Russia bilang logistics personnel, alagad kan mag-abot duman, igwa inining pinirmahan na kontrata sa Ministry of Defense kan Russian Federation asin ipigdesignar sa sarong combat role bilang parte kan 51st Parachute Regiment.
