LEGAZPI CITY—Nagdistribuir an lokal na gobierno kan Camalig, Albay nin rescue vehicles sa mga barangay na pwedesir magamit sa panahon nin emerhensya asin kalamidad.
Segun ki Camalig Mayor Caloy Baldo, sa intrevista kan Bombo Radyo Legazpi, nasa 49 rescue vehicles na an saindang naidistribuir alagad may saro pang barangay an Barangay Cabangan an saindang dae natawan huli sa pagkulang sa pondo para sa pagbakal kaini.
Alagad pigsierto man kan opisyal na matatawan man giraray an naunambitang lugar, huli sa mabakal pa sinda nin dugang na 10 behikulo kun saen an iba digdi an gagamiton man sa iba pang programa kan saindang lokal na gobierno.
May mga ekipahe suboot ining kaiba na pwedesir magamit kan mga pasyente o mga na-aksidente asin magin sa pagpapa-ebakwar nin mga residentes sa barangay.
Mientrastanto, abiso man kan alkalde sa namamanwaan na magpasiring na sa evacuation centers huli sa dificil na an mag-ebakwar urog na pag nasa katahawan na nin pangrarapado an bagyo.
