LEGAZPI CITY—Gadan an sarong 48-anyos na lalaki makalihis na makabangga sa nakaparadang motorsiklo sa Brgy. Icanbato, Caramoran, Catanduanes.
Segun ki Caramoran MPS COP PCPT Ali-Marjan Amanon, sa intrevista kan Bombo Radyo Legazpi, na mantang pigbabaybay kan biktima an tinampo kan Brgy. Icanbato pasiring sa saindang barangay sa Dariao, napansin na kan mga nakahiling na nawaran na ini nin balanse rason ngani makabangga ini sa nakaparadang motorsiklo sa lugar.
Tulos man ining nirespondehan kan saindang mga kapulisan kairiba an Rural Health Unit asin Municipal Disaster Risk Reduction Management Office para sa atensyong medikal.
Alagad dineklarar na dead on arrival an biktima.
Napag-araman na an biktima nasa impluwensya nin arak asin nagkaigwa nin cardiac arrest mantang nagmamaneho.
Mientrastanto, nagpagiromdom an opisyal sa publiko na dae na magmaneho lalo na kun nasa impluwensya nin bugsok na likido.
