LEGAZPI CITY—Nakumpiskar kan mga otoridad an labi sa P442,000 kantidad nin ilegal na droga sa sarong high value target individual sa ikinundusir na buy-bust operation sa Zone 2, Brgy. 37-Bitano, Legazpi City.
Sa pahayag ni Legazpi City Police Station Public Information Officer Police Executive Master Sergeant Carlos Paña, binisto an suspek na si alyas “Boy,” 49-anyos, may agom, sarong parabuno nin orig, asin residente kan nasambitang barangay.
Naarestar ini makalihis na magpabakal sa sarong police poseur buyer nin 50 gramos nin pigtutubudang shabu na may kantidad na P340,000 karibay kan budol money na P170,000 kun saen kaiba digdi an P1,000 genuine money.
Narekober sa suspek an kadugangang duwang pakete nin shabu na may gabat na 15 gramos asin kantidad na P102,000.
Afuera digdi, nakumpiskar man an duwang pakete na dried marijuana na may gabat na 0.5 gramo asin kantidad nin P60.
Mahahampang an suspek sa kasong pagbalgar sa Republic Act No. 9165 o Comprehensive Dangerous Drugs Act of 2002.
