LEGAZPI CITY – Nagresibe nin Pangkabuhayan Free Starter Kits an 44 na nagtapos kan masusing training sa Repair Electronic Controlled Domestic Appliances asin Bread Pastry Production sa irarom kan Special Training for Employment Program kan Technical Education and Skills Development Authority (TESDA) Sorsogon.
An mga starter kits an hale sa Department of Labor and Employment (DOLE) Sorsogon na ipigheras ni provincial head Marilyn Luzuriaga.
Obheto kan pagtatao nin kaaraman kan TESDA Sorsogon asin pananao kan DOLE Sorsogon nin mga starter kits an matabangan an mga ini na makapagpuon sa paghahanap-buhay asin pagnenegosyo ngane na masimbagan o masolusyunan an primerong pangangaipuhan kan kada komunidad.
Pig-engganyar man ni TESDA supervising specialist Ricardo B. Detecio an mga benepisyaryo na gamiton nin tama an mga starter kits ngane na mapakinabangan ini na kumita asin maitaas an antas kan pamumuhay kan saindang mga pamilya.
Ipig-eksplikar man kan opisyal kan TESDA na obheto kan ipigheras na kaaraman kan ahensya an simbag kan gobyerno asin tulos masolusyunan an kawaran nin mapagkakakitaan, mabawasan an insidente kan kadifisilan sa komunidad sa paagi kan mga halipot na panahong training urog na sa mga tawong dae natawan nin tyansang makapag-adal.
