LEGAZPI CITY- Pig-iimbestigaran na sa ngonian kan mga otoridad kun sain hale an nasa 44 sachet nin pigtutubudan na shabu na nagkakantidad nin P162,000 na narekober sa isinagibong Oplan Galugad sa Albay Provincial Jail.
Sa intrevista kan Bombo Radyo Legazpi ki Pol. Lt. Col Rodelon Betita, hepe kan Daraga PNP na kasabay kan isinagibong operasyon, narekober an mga nakatagong shabu sa mga karsel kan inmates.
May itinago pa suboot sa irarom kan tiles asin sa kun sain-sain pang parte kan pasilidad.
Segun sa hepe, saro pa sa mga inmates an nagbalong itapok sa inidoro an iligal na droga tangarig na dae mahiling kan mga otoridad alagad marikas man ining napugulan.
Pigtutubudan kan PNP na posibleng nailusot kan mga bisita kan inmates an droga o may kasabwat an mga ini sa mismong personahes kan provincial jail.
Mientras tanto, inasegurar kan opisyal na papanimbagon an mga ini sa pagpalaog kan iligal na droga mantang hihigotan pa an seguridad tangarig dae na mautro pa an kaparehong insidente.
