LEGAZPI CITY- Isasairarom na sa eksaminasyon kan crime laboratory an nasa 40 bloke kan pigtutubudang cocaine na narekober sa kadagatang sakop kan Brgy. Bagacay, Gubat, Sorsogon.
Sa ekslusibong intrevista kan Bombo Radyo Legazpi ki P/Maj. Jim Jeremias, hepe kan Gubat Municipal Police Station, narekober suboot an mga nasabing pigtutubudang iligal na droga kan tulong parasira na nakapatos pa sa sarong selyadong karton.
Klinarificar man kan opisyal na dawa 40 packs an nakua, nasa 39 kilo an gabat kan nasabing mga bloke.
Dae pa man makumpirmar sa ngonian kan PNP kun pira an aabuton kan nasabing substance en kaso magpositibo.
Pig-aaram pa man kun konektado ini sa mga enot nang narekober na cocaine sa Kadagatang Pasipiko.
Pinakahudyan na nakua sa kadagatang sakop kan Bicol an sarong bloke nin cocaine sa Rapu-Rapu, Albay kan mag-amang parasira.
