LEGAZPI CITY — Klaradong ‘picture’ suboot sa mga kaso sa media killings sa Pilipinas an mayor na obheto sa pagpapadara kan mga special agents kan Presidential Task Force on Media Security (PTFoMS) sa nagkapirang rehiyon.
Sa ekslusibong intrevisa kan Bombo Radyo Legazpi ki PTFoMS Executive Director asin Usec. Joel Sy-Egco, ‘sensitive’ suboot an magiging trabaho kan mga imbestigador na maimbestigar sa halangkaw na numero kan panggagadan asin pangha-harass sa mga taga-media sa mga inapod kaining ‘most vulnerable areas’.
Dugang pa ni Usec. Egco na kaibanan an regional police office kan Bicol sa apat na rehiyon na dae nakapagsumiter kan pighahagad na data sa media killings antes na mapaso an itinaong deadline kaitong Pebrero.
Katakod kaini, inihayag kan opisyal na an mga nasabing lugar an tutok kan special agents mantang inasegurar na aaramon man an rason kun nata dae tulos nakapagtao kan data saka na magibo kan magkakanigong aksyon.
Klinaripikar pa ni Egco na tutok bako sana an mga current unsolved cases sa mga rehiyon urog na sa Mindanao kundi an iba pang kaso na suboot ‘dekada’ na an inabot sa halawig na proceedings o imbestigasyon.
