LEGAZPI CITY- Tinawan duon kan state weather bureau an importansya kan preparasyon kan mga namamanwaan asin stakeholders ngani na maibsan an epekto kan pigkakahaditan na super El Niño sa nacion.
Segun ki Masbate Chief Meteorological Officer Rizza Bartolata sa intrevista kan Bombo Radyo Legazpi na posibleng hasta sa ika-duwang quarter kan taong 2027 magdurar an epekto kan nasabing super El Niño.
Katakod kaini, sinabi kan opisyal na puon sa bulan nin Oktubre, posibleng maeksperyensyahan na kan apat na provincia sa Bicol region an drought condition, kaibanan an Camarines Sur, Camarines, Norte, Sorsogon asin Catanduanes.
Paglaog man kan Nobyembre, an Sorsogon asin Masbate man an nasa dry spell season na, alagad sa bulan kan Disyembre hasta Marso, an bilog na Bicol na suboot an nasa drought condition.
Huli digdi, nagpatanid si Bartolata sa posibleng magin epekto kan apat na bulan na tagmara urog na sa mga paraoma asin iba pang mga nangangaipo nin tubig.
Katakod kaini inegnayar kan opisyal na bako sana an gobierno an paghiro ngani na malabanan an drought condition, kundi maging an komunidad, lambang household, asin kada indibidwal ngani na maski papano an mabawasan an epekto kan nasabing penomena.
An drought an nangangahulugan na tulong bulan na way below normal an uran o below 40% kan rainfall amount an nareresibe o limang bulan na below normal an uran o nasa 41% hasta 80% kan normal na uran an nareresibe.
