LEGAZPI CITY-Kinumpirma kan Office of Civil Defense (OCD) na apat na katawo an nagadan huli sa pinagsarong epekto kan bagyong Luis, bagyong Maymay, asin habagat sa nacion.
Duwa an nairehistrong nagadan sa Benguet makalihis matabunan kan landslide, mantang duwa man an nairehistrong nagadan sa rockslide sa Rodriguez, Rizal.
Saro man an nairido sa Benguet asin sa presente wara pang nairerehistrong nawawara.
Uminabot man sa 132,956 indibidwal o 39,879 pamilya poon sa manlain-lain na rehiyon an naapektaran kan nasabing raot kan panahon.
Sa datos na ini, nasa 6,215 indibidwal o 2,021 pamilya an temporamenteng nagtetenir sa 61 evacuation centers.
Nakapagrehistro man an ahensya nin 14 danyos sa kaharongan kun sain 13 digdi an bahagyang nagkaigwa nin danyos asin saro an totally damage.
Mientras tanto, nasa P3.59 milyon na an naibarewas na ayuda kan gobierno sa mga apektadong residente, mantang padagos an pagbabantay sa epekto kan habagat asin bagyong Dolphin na nasa pa kan Philippine Area of Responsibility.
