LEGAZPI CITY- Dakop kan mga otoridad an 31 mountaineers hale pa sa Los Baños, Laguna makalihis na magsakat sa Bulkang Mayon sa provincia kan Albay na warang permiso hale sa Provincial Tourism Office.
Sa nagunong impormasyon kan Bombo Radyo Legazpi, maagahon kan mag-crater climb an mga ini sa pangengenotan kan tour guide na nabistong si Jeff Barrientos, 31-anyos na hale man sa Laguna kun saen naglaog an mga ini sa Brgy.
Bonga sa banwaan kan Bacacay asin nakatalaan na mag-exit sa Brgy. San Roque, banwaan kan Malilipot.
Sarong concerned citizen an nagpa-abot kan impormasyon kaya tulos na binilog an pwersa na kompuesto kan mga pulis, provincial asin municipal tourism office, Provincial Environment and Natural Resources Office siring man si Mayor Cenon Volante kan Malilipot kontra sa mga ini.
Sa pagbaba kan mga ini, danakop kan mga otoridad an mga mountaineers kun saen napag-araman na taong 2012 pa palan nagdadara kan mga turista sa provincia si Barrientos asin nagsasakat sa Mt. Mayon na warang otorisasyon.
Mientras tanto, tulos man na nakalibre an mga nasabing mountaineers makalihis na makapagtao kan P5, 000 na multa sa nagibong pagbayolar.
Mahigot man na ipigbabawal an pagsakat sa Mt. Mayon urog na sa presenteng estado kaini na nakataas man giraray sa Alert Level 1 o abnormal na lebel.
