LEGAZPI CITY — Pinull out na kan Philippine Red Cross Albay Chapter an nakaset-up na kutang water bladders sa mga evacuation center sa Legazpi City makalihis an ipigsugong decampment kan mga ini ni Mayor Noel Rosal.
Segun ki Philippine Red Cross Albay Chapter Operations Officer Gerald Gapayao, nakaset-up na kuta sa Albay Central School asin Bagumabyan Elementary School an tig-5,000 na litro nin bladder kaiba an top stand alagad biglang nag-decamp an mga evacuees.
Sa ibong kaini, sienerto man liwat ni Gapayao na preparado an bladder enkaso magkaigwa pa nin evacuees sa ciudad.
Ngonian na aldaw, nakatalaang mag-set up ki water bladder an Red Cross sa Upper Malabog Elementary School asin madeliver man nin anom na toilet bowl sa Lower Binogsacan Elementary School na maserbing temporary CR kan mga evacuees.
Dugang pa ni Gapayao na matenir na naka-standby an tulong tanker na posibleng ikaag sa tulong distrito kan aldaw enkasong mag-escalate an sitwasyon.
Sinabi pa ni Gapayao na maabot ngonian na aldaw an mga bisita hale sa Manila na mahiling kan aktwal na sitwasyon ngani na matawan nin kasimbagan an pangangaipuhan kan evacuees.
Afuera kaini, 24/7 man suboot an operasyon kan saindang medical team na bukas magresponde sa Albay district asin ciudad kan Legazpi.
