Tolong parasisirang Pilipino an nagsapo nin lugad makalihis bombahon kan tubig kan Chinese vessels an pigkarkulong 20 Filipino fishing boats sa Escoda Shoal kan Biyernes, Disyembre 12, susog sa Philippine Coast Guard (PCG).
Segun ki PCG Spokesperson for West Philippine Sea Commodore Jay Tarriela, tinarget kan water cannon gikan sa Chinese Coast Guard (CCG) vessels 21559 asin 21562, kaiba an Chinese Maritime Militia (CMM), an mga parasisira na legal na naglalawod sa lugar, na nagkawsa man nin danyos sa duwang bangka.
Pinutol man suboot kan CCG Rigid Hull Inflatable Boats an mga linya kan anchor kan nagkapirang bangka, na nagbugtak sa peligro sa mga tripulante sa tahaw kan makukusog na hukol.
Mantang pasiring sa mga apektadong parasisira, hinarang man suboot kan CCG ang mga PCG vessel MRRV-4403 asin MRRV-4411. Nagrani pa suboot an CCG-23519 sa PCG vessel sa laog sana nin 35 yarda sa kasagsagan kan night time navigation.
Sa ibong kan peligro, nakaabot an PCG sa mga parasisira asin tulos sindang natawan nin medikal na atensyon, pati na man nin pagkaon, yelo asin fuel.
Nakipagkoordinar na man an PCG sa MV Pamalakaya nganing masierto an kaligtasan kan mga parasisira mantang nagpapadagos an saindang paglalawod.
Segun pa ki Tarriela, nagluwas nin pahayag an China na binisto an paggamit kan “necessary control measures” laban sa mga parasisirang Pilipino.
