LEGAZPI CITY — Salbadong nakabalik sa pamilya kaini an tulong parasira Brgy. Tubli banwaan kan Caramoran sa probinsya kan Catanduanes makalihis an labi sarong semanang paghahanap sa mga ini.
Sa nagunong impormasyon kan Bombo Radyo Legazpi, nasambitan na maagahon kan Marso 17 kan maghali an mga nasabing parasira ngane magpasiring sa Kalipunga-wan Fishing Sanctuary o Benham Rise kan Kadagatang Pasipiko lunad kan sarong puting motorized banca na may markang “Helvin.”
Masira suboot an mga ini kaya nagpasiring sa lugar alagad nahandal na an pamilya kain kan dae nag-uli an mga parasira kan suminunod na aldaw.
Sa takot na may maraot na nangyari sa tahaw kan kadagatan, naghagad nin tabang sa mga otoridad si Nelly Briones, 50 anyos ngane hanapon an agom na si Edwin Briones, 49 anyos kaiba an aki kaini si Edwin Briones Jr., 24 anyos asin si Dindo Lucero, 31 anyos na residente man sa nasabing banwaan.
Haros mawaran na suboot nin paglaom an nasabing misis na makakabalik pa an mga ini nin buhay alagad huli sa pagpangadyi, dakula an pasalamat kaini na nakauli sa harong an mag-ama kan banggi kan petsa 25 kan Marso na tulos mang ipinaaram sa mga pulis na naghahanap.
Bako na estranghero sa Benham Rise an mga Catandunganon urog na dakulang porsyento kan mga nadadakop na sira kan mga ini an hale sa lugar na mainit mang pig-oolayan sa ngunyan makalihis na mahiling an presenysa kan survey ships kan China digdi na bistong kalaban kan Pilipinas sa West Philippine Sea.
