LEGAZPI CITY-Gadan an 3 miyembro kan Moro Islamic Liberation Front (MILF) asin 3 iba pa an irido makalihis na abangan sinda kan mga armadong indibidwal mantang sakay kan duwang minivan sa Maguindanao del Sur.
Basado sa impormasyon, sinabing saro sa mga irido an commander kan 128th MILF Base Command, na tulos na dinara sa ospital.
Pasiring man an mga biktima sa Pembalkan, Mamasapano kan abangan sinda sa Proper Linantangan sa Shariff Saydona Mustapha.
Segun man sa mga otoridad, nagluluwas sa imbestigasyon na hale sa 118th Base Command kan MILF an mga suspek na nag-ambush asin tumakas matapos an pambabadil.
Nakuwa sa pinangyarihan kan insidente an labi sa 100 basyo nin bala hale sa manlain-lain na kalibre nin badil.
Mientrastanto, pigaaram pa kan mga otoridad kung igwang kinaaraman sa clan war o “rido,” an nasambitang krimen.
