LEGAZPI CITY – Kinumpirmar ni Albay Public Safety and Emergency Management Office (APSEMO) chief Dr. Cedric Daep sa intrevista kan Bombo Radyo Legazpi na tulong katawo an binawian nin buhay makalihis an magdamlag na pag-uran sa Purok 2, Brgy, San Franciso sa ciudad kan Legazpi.
Binisto an mga ining sinda Marco Alegre, 3; Mia Loreto, 20 asin Mauro Alegre, 26.
Segun ki Daep, 13 an nakaistar sa harong kun sain nasa salbado naman na kamugtakan an iba pa.
Tinamaan an harong kan mga ini kan nagrasay na daga huli naman sa paglumoy kasabay kan makusog na bulos kan uran sa magdamlag.
Inabisuhan na man an mga ining mag-evacuar alagad nagtenir man giraray sa nasabing lugar.
Nilinaw man kan opisyal na dara kan easterly rain an nasabing pagrasay kan daga urog na may mga pag-uran na man sa provincia, dae pa man enterong nakakalaog sa Philippine Area of Responsibility (PAR) an raot nin panahon.
