LEGAZPI CITY- Kasado na an gigibuhon na 3 aldaw na tigil pasada kan grupong manibela asin piston.
Puon sa aga sagkod biernes sabay- sabay na maimplemintar nin transport strike an nasambitang mga transport group ngane na kalampagon an gobyerno dapit sa PUV modernization program.
Segun kay Mar Valbuena an Manibela president sa naging intrevista kan Bombo radyo Legazpi, maabot sa 80 mil na mga drivers an mapartisipar sa gigibuhon na nationwide transport strike kun saen masabay man suboot digdi an nagkapirang mga jeepney drivers gikan sa ciudad kan Naga na mapasiring sa Calabanga, Camarines Sur.
Alagad digdi suboot sa ciudad kan Legazpi an dae man sierto na masabay sa tigil pasada huli ta kadaklan na drivers an nakapag consolidate na.
Dahilan suboot kan saindang pagprotesta an dapit sa dae pagkonsiderar ni Presidente Marcos kan pinaluwas na resolusyon kan senado dapit sa pagpapapundo kan pag-implementar kan PUV modernization program.
Mientrastanto, pag-aadalan pa man liwat kan transport group an mga lakdang kaini sa mga masunod na aldaw.
Pangapudan kan opisyal sa mga maaapektaran na commuters an pagsabot asin nangangapudan man ini na madangog kan gobyerno an saindang kamawotan.
Mientrastanto, ikinaogma kan Manibela an pagkakaigwa nin bigtime oilprice rollback ngunian na semana kun saen dakulang bagay suboot ini para sa mga motorista.
Hagad man kaini na mas lalo pang maibaba an presyo kan mga produktong petrolyo sa nasyon.
