LEGAZPI CITY- Tulong mga Bicolano an nakasabay bilang semifinalist sa national level kan 2024 Search for Outstanding Government Workers.
Segun ki Civil Service Commission Bicol Director Atty. Daisy Punzalan-Bragais sa intrevista kan Bombo Radyo Legazpi na kaibanan sa mga ini an Dangal ng Bayan Award regional winner na si Donna Lyn Geronimo kan Department of Education Naga City asin Rick Habana, administrative Aide I kan Department of Education Catanduanes.
Kaibanan pa sa semifinalist si CSC Pagasa award Regional Winner Anita Andueza, Senior Jail Office 4 kan Bureau of Jail Management and Penology.
Obheto kan nasabing programa na bistuhon an natatanging mga empleyado asin opisyal kan gobierno na nagpapahiling nin magayon na ehemplo asin inspirasyon.
Aminado an opisyal na difisil na magpili kan mga manggagana kan honra huli ta dakol an mga inspiring na istorya, lalo na an mga paratukdo sa rehiyon na nagsasakripisyo kan saindang mga oras asin kakayanan ngani na makatabang sa mga estudyante.
Sinabi ni Bragais na an mga manggagana sa nasabing Search for Outstanding Government Workers an makakaresibe nin P200,000 cash incentives, trophy, asin an mga gana sa Dangal ng bayan asin Presidential lingkod bayan an magkakaigwa nin promosyon.
Kun enkaso man na warang abilable na mas halangkaw na posisyon, makakaresibe an empleyado nin sahod na katumbas kan mas halangkaw na posisyon.
