LEGAZPI CITY — Pinunan na an training kan tulong Bicolano athletes na napiling makasabay sa delegasyon kan Pilipinas para sa 2019 ASEAN School Games na gigibuhon sa July 17-25, 2019 sa Semarang, Indonesia.
Kaibanan digdi sinda Lheslie de Lima (Camarines Sur,) Divina Mahusay (Camarines Norte) asin Jasmin Bombita (Sorsogon) na mga nanggana sa Athletics event sa Palarong Pambansa 2019.
Sa intrevista kan Bombo Radyo Legazpi ki Department of Education (DepEd) Bicol Director Gilbert Sadsad, ma-training muna an mga atleta digdi sa rona antes na magpasiring sa Manila tangarig sabayan na an ibang atleta sa ensayo sa Rizal Memorial Stadium.
Nagkaigwa man muna nin briefing sa training programs na gigibuhon bilang preparasyon sa aktibidad.
Segun pa ki Sadsad, an Philippine Sports Commission asin DepEd central office na an matao nin financial assistance para sa mga atletang masabak sa international competition.
Ipigheras man kan director na in-adopt na si Lheslie kan Francis Padua Papica Foundation na matao nin tabang para digdi.
Afuera kaini, nakaresibe man nin spike shoes asin running shoes an ipigkonsiderar na “Barefoot Runner” kan Bicol.
Malaban si de Lima sa 800m, 1,500m asin 3,000m run mantang si Bombita sa Triple Jump asin Long Jump asin malaban man si Mahusay sa 4x100m Relay.
