LEGAZPI CITY- Matrayumpo an isinagibong One Time Big Time Operation kan Philippine Drug Enforcement Agency (PDEA) Bicol sa koordinasyon sa Philippine National Police (PNP) sa tulong magkakasuway na barangay sa ciudad kan Legazpi.
Sa intrevista kan Bombo Radyo Legazpi ki PDEA Bicol information officer Cotton Talento, labi P200, 000 an market value kan pigtutubudang shabu na narekober sa implementasyon kan search warrant kontra sa mga drug personality na haloy naman na pigmomonitor kan ahensya.
Sa Brgy. 28 Victory Village, naarestar si Jorge Pesilla na nakuhaan nin apat na sachet kan pigtutubudang shabu sa gabat na 20 gramo o P136, 000 na market value.
Naaprehender man si Michael de Tablan sa Brgy. Pigcale makalihis na makuhaan nin siyam na sachet kan nasabing drug item na igwang kaparehong gabat na 20 gramo mantang pig-aaram pa an market value kan nakuang anom na sachet kan pigtutubudang shabu ki Rolando Bartolome sa Brgy. Sabang.
Sabay-sabay na isinagibo an nasabing operasyon kun sain naaraman na ginibo nang drug den kan mga nasabing persona an kani-kaniyang harong mantang pigtutubudang konektado man sa lambang saro an mga ini sa pagbale sa sarong drug group sa ciudad.
Mientras tanto, nakatalaan na sunadan nin kasong pagbayolar sa Section 11 o possession of illegal drugs kan Acta Republika Numerado 9165 o Comprehensive Dangerous Drugs Act of 2002 an mga nasabing persona.
Ipinagpasalamat man ni Talento an suporta kan mga stakeholders asin partner agencies sa mga ipigkakasang anti-illegal drug operations.
