LEGAZPI CITY- Ipigsasairarom na ngonian sa magkakanigong proseso an tolong drug personality na naaktuhang nagagamit kan iligal na droga sa ikinasang anti-drug raid kan pulisya sa Albay.
Nagresponde suboot an Ligao City Police makalihis na maresibe an impormasyon sa sarong harong sa Policarpio St. Brgy. Bagumbayan, ciudad kan Ligao na pigagibo suboot ining drug den.
Nagresulta an operasyon sa pagkakaarestar kina Immanuel Abo Jr., 38-anyos; Mark Anthony Buangin, 24-anyos asin John Michael Rico, 25-anyos na nadakop pang nagpa-pot session.
Narekober man hale sa mga ini an pitong saradit na sachet kan pigtutubudang shabu, duwang sachet na wara nang laog, sarong cellphone, cash na nagkakantidad nin P1,000 asin manlaen-laen na drug paraphernalia.
Sa ngonian, pighahanda na man an kasong kakahampangon kan mga ini sa nagibong pagbayolar sa ley.
