LEGAZPI CITY- Nagtetenir na ngonian sa kustodiya kan Philippine Drug Enforcement Agency (PDEA) Bicol an tulong personalidad makalihis na magpositibo an isinagibong buy bust operation sa Brgy. Bogtong sa ciudad kan Legazpi.
Arestado sinda Victor Musni Balictar Jr., Steven Roger Altea asin Kenjie Babasa na anas residente kan nasabing ciudad makalihis na makuhaan nin duwang darakulang sachet kan pigtutubudang shabu na kabangang kilo an gabat asin may market value na P3.4 million.
Sa intrevista kan Bombo Radyo Legazpi ki PDEA Bicol Director Christian Frivaldo, resulta suboot an matrayumpong operasyon sa mga enot nang isinagibong paglamag sa mga drug personalities sa anom na major centers kan drug trade sa ciudad.
Segun pa ki Frivaldo, kaibanan man an mga ini sa mga itinukdong darakulang supplier sa ciudad na direkta pang nagkukua nin main supply sa National Capital Region (NCR).
Mientras tanto, laoman pa suboot an mga dagos-dagos na mga operasyon sa Bicol urog na sa Rinconada area kan Camarines Sur asin Legazpi City.
Nag-apelar man ini sa mga Barangay Anti-Drug Abuse Council (BADAC) sa kooperasyon sa pagmonitor kan mga imbwelto sa iligal na droga na nagtetenir sa mga nasasakupang lugar.
