LEGAZPI CITY-Nasampulan nin wheel clamping an nasa 26 na mga behikulo na iligal na nakaparada sa ciudad kan Legazpi.
Segun kay Public Safety Office Head Octavio Rivero, sa intrevista kan Bombo Radyo Legazpi, na poon Setyembre 9 hasta 11 an nakapag-clamping sinda nin 26 na mga behikulo asin pig-isyuhan ninda ini nin mga ticket kun sain kaipuhan itubos sa City Treasurer’s Office.
Mahiwas na man suboot an parte kan Merkado sa ciudad huli sa dai na nin mga nagpapa-park digdi.
Pigsasagibo man an nasabing operasyon tuyong aldaw nin lunes hasta biyernes sa bilog na ciudad asin balak man nindang dumanon an nagkapira pang mga lugar sa ciudad.
Dugang pa ni Octavio na dai man sindang pigpipili na behikulo asin patas sinda sa serbisyo magin opisyales man ini kan gobierno.
Kadaklan suboot sa nadadakop ninda an mga four wheels an behikulo asin nakaparada sa “no parking, clamping soon” signages.
Dagdag pa niya na dai man basta hahalion an clamping sagkod dai pa natutubos an saindang mga behikulo.
Ma-request man suboot sinda nin sarong personnel hale sa City Treasurer’s Office kan Legazpi, ngani dai na maantala an byahe kan mga nadadakop na motorista.
Abiso man sa drivers na sunodon an taripa bilang ordinansa ini kan city government sa ciudad kan legazpi.
Pagirumdum man ni Octavio sa mga motorista, asin mga driver kan tricycle na dai na mag-overcharge sa mga pasahero huli sa naapektaran kaini an saindng mga buhay asin matatawan nin penalidad enkaso na maireklamo.
