LEGAZPI CITY — Isinairarom na sa drug test an naarestar na drug personality sa ikinasang buy bust operation kan mga otoridad sa P-2 Upper Binogsacan, banwaan kan Guinobatan, Albay.
Sa intrevista kan Bombo Radyo Legazpi ki PC/Insp. Wilfredo Espineli, hepe kan Guinobatan Municipal Police, ikinasa an operasyon kontra sa suspek na si Nilo Mirandilla, 32-anyos.
Segun sa hepe, pinabakalan kan suspek nin sarong sachet nin pinagtutibudan na shabu an poseur buyer karibay kan P500.
Alagad sa isinagibong body search ki Mirandilla, narekober pa kan operating team an 21 sachet nin suspected shabu na isinumite na sa Crime Laboratory Office para sa laboratory test.
Mientras tanto, napag-araman na sarong drug surrenderee an suspek asin nakapagtapos pa sa community based rehabilitation program kan gobierno alagad liwat na nagbalik sa iligal na aktibidad.
Napag-araman na personal na nagkukua nin suplay an suspek sa Manila asin ini an nagigin supplier sa banwaan kan Guinobatan.
Mientras tanto, pighahanda na ang kasong Republic Act 9165 o Comprehensive Dangerous Drugs Act of 2002 na isasangat kontra digdi.
