LEGAZPI CITY- Pigbubusol ngunyan kan Population Commission an kampanyang pag-ataman sa mga nagbabados na babayi ngani na mabawasan an pig-aapod na maternal mortality o an pagkagadan kan mga ina sa pangaki.
Sigon sa planning officer kan Population Commission (POPCOM) Bicol na si Josephine Chua, nairehistro sa rehiyong Bicol an 2015 maternal deaths sa kada 100,000 na live births sa first quarter kan taong 2016.
Tinawan duon ni Chua na warang babayi an dapat na magadan sa pagtatao nin buhay kun kaya dapat na atamanon an mga ini mantang nagbabados pa sana.
Lakdang suboot digdi kan gobyerno an mga pinarahay pang pasilidad asin pagbabawal sa pag-aki sa harong o hilot.
Sigon pa ki Chua, mawot ni Presidente Duterte na igwa nin pigagamit na family planning method an gabos na babaying may kakayanan pang mag-bados kun kaya yaon an mga programa kan gobyerno arog kan mother’s class ngani na matabangan an mga mag-agom sa salbado asin responsableng pagpapamilya.
