LEGAZPI CITY—Nagsagibo nin youth camp an mga kajovenesan gikan sa Germany asin Bicol Region kan Agosto 5-6 sa provincia kan Catanduanes.
Segun ki Rev. Dennis V. Moralde, Administrative Pastor kan United Church of Christ in the Philippines Virac Evangelical Christian Church, sa intrevista kan Bombo Radyo Legazpi, kabale sa mga delegasyon an 9 German youth asin 10 Filipino youth hale sa local churches kan South Bicol Conference magin an mga Filipino clergy.
Kan Agosto 5, igwang delegasyon an nagbisita sa provincia hale sa Evangelical Church District Münster, Germany na partner in ministry kan South Bicol Conference kan United Church of Christ in the Philippines.
An nasabing partnership an haros 25 taon na asin nagpapadagos pa; kabale man sa pigtukar kan partnership an mapadapit sa culture understanding asin environmental issues.
Huli man sa pirming pig-aagihan nin bagyo an provincia obheto man kan pagbisita an nganing maaraman kun ano an piggibo kaini mapadapit sa climate resiliency, disaster preparedness asin kun igwa nin community-based na disaster risk reduction na mga programa.
Mientrastanto, sa presente yaon an mga delegado sa provincia kan Sorsogon para sa pag-atendir sa panibagong lecture mapadapit sa kapalibutan.
