Nahilingan nin suboot pagbayolar, warang resibo asin supporting documents an isinumiter na 2023 accomplishment reports kan Office of the Vice President (OVP) katakod kan confidential fund sa impeachment trial ni Vice President Sara Duterte.
Sa direct examination sa testigo kan prosekusyon sa testigong si dating COA state auditor Roderick Wamil, ipinahiling ni Prosecution counsel Atty. Lorna Kapunan an tulong accomplishment reports kan OVP na may petsang Marso 30, 2023, Hulyo 11, 2023, asin Oktubre 9, 2023.
An nasabing mga dokumento an ini-stipulate man kan kampo kan depensa.
Nakapirma sa tulong dokumento si VP Sara, na nangangahulugan na inaprubaran mismo kan bise presidente an mga laog kan accomplishment reports, segun sa testigo kan prosekusyon na si dating COA state auditor Roderick Wamil.
Sinabi ni Wamil na laog kan enot na accomplishment report kan duwang items na bako “allowed” sa irarom kan Section 4.8 kan Joint Circular 2015-01 o ipinagbabawal na gamitan nin confidential funds.
Kan haputon ni Atty. Kapunan an testigo sa iba pang obserbasyon, tinukoy ni Wamil an saro pang item para sa payment of reward kun sain warang isinumiter an OVP na anuman na “document evidencing the success’ o dokumento na nagpapatunay kan trayumpo kan information gathering o surveillance activities hali sa impormante.
Sa ikaduwang accomplishment report, sinabi ni Wamil na igwa man nin line items na nagkakantidad nin P40 million na pondo para sa medical asin food assistance, siring man an P10 million na pondo para sa mga insentibo asin travel expenses, na bako allowable sa joint circular huli ta “exclusive” o limitado sana an listahan kan pigtutugutan na confidential expenses.
Nagmosyon an depensa na i-strike out sa rekord an simbag kan testigo pag-abot sa payment of rewards. Katwiran ni Atty Poa, an pinag-oolayan sana iyo an sala sa paggamit kan confidential funds alagad nagcome-up na sa findings an testigo na bako parte kan accomplishment report.
