LEGAZPI CITY – Duwang oras sana an ipigturog kan ikatulo sa may pinakahalangkaw na rating sa October 2019 Geodetic Engineer Board Examination makalihis na maaraman an magayon na bareta.
Dawa minsan nang inambisyon, ikinabigla man giraray suboot kaini na magin saro sa topnotchers kan nasabing exam.
Sa ekslusibong intrevista kan Bombo Radyo Legazpi ki Clifford Marco Arimado, napalukso pa suboot sa labing kaogmahan an ama kan maaraman an bareta mantang grabe man an hibi kan ina sa kaogmahan.
Napag-araman na sa Brgy. Cruzada sa ciudad kan Legazpi nagtetenir an ina kaini asin nasa bakery man sa Parañaque an ama.
Labi man an pagpapasalamat ni Arimado sa mga nagin inspirasyon sa pag-otob kan pangaturugan urog na sa Diyos asin mga kaeskwela asin propesor sa Bicol University. Ngonian pa lang, excited na si Arimado na makauli sa Bicol urog na miss niya na suboot an Bulkang Mayon na posibleng mangyari sa Nobyembre 11.
Napag-araman na nagsentro man an research study kaini kan college sa pagbabagong nangyari sa Yawa River antes asin makalihis an pag-aalburoto kan Mayon kan 2018.
Mientras tanto, piglalaoman kaini sa ngonian na makaguno muna nin eksperyensya sa field work sa paagi kan pakikipagpartner sa pribadong kumpanya mantang pinag-iisipan pa kun ano an trabahong lalaugon para mai-apply an expertise.
